ଭୁବନେଶ୍ୱର(ବ୍ୟୁରୋ)- ଆସନ୍ତା ୧୬ ତାରିଖରେ ଖାଲି ଖାଲି ହେବାକୁ ଯାଉଥିବା ୪ଟି ରାଜ୍ୟ ସଭା ଆସନ ପାଇଁ ଭୋଟ ଗ୍ରହଣ ହେବ । ସେଥିପାଇଁ ନାମାଙ୍କନ ପତ୍ର ଦାଖଲ ମଧ୍ୟ ଶେଷ ହୋଇ ଯାଇଛି । ସଂଖ୍ୟା ଦୃଷ୍ଟିରୁ ଭାଜପା ୨ଟି ଆସନରେ ଏବଂ ବିଜେଡି ଗୋଟିଏ ଆସନରେ ବିଜୟୀ ହେବା ଏକ ପ୍ରକାର ନିଶ୍ଚିତ ହୋଇ ଯାଇଛି । ତେବେ ଚତୁର୍ଥ ଆସନକୁ ନେଇ ରୋମାଞ୍ଚକର ପରିସ୍ଥିତି ସୃଷ୍ଟି ହୋଇଛି । ବିଜେଡି ସୁପ୍ରିମୋ ନବୀନ ପଟ୍ଟନାୟକ ମାର୍ଚ୍ଚ ୧ ତାରିଖରେ ସନ୍ତୃପ୍ତ ମିଶ୍ରଙ୍କୁ ଦଳୀୟ ପ୍ରାର୍ଥୀ ଭାବେ ଘୋଷଣା କରିଥିବା ବେଳେ ଡାକ୍ତର ଦତ୍ତେଶ୍ୱର ହୋତାଙ୍କୁ କମନ କ୍ୟାଣ୍ଡିଟେଡ ଭାବେ ଘୋଷଣା କରିଛନ୍ତି । ନବୀନ ଦ୍ୱିତୀୟ ପ୍ରାର୍ଥୀ ଘୋଷଣା କରି ମାଷ୍ଟର ଷ୍ଟ୍ରୋକ ଖେଳିଲେ ବୋଲି ଦଳର ଛାମୁଆ ନେତାମାନେ ଗଣମାଧ୍ୟମରେ ପ୍ରତିକ୍ରିିୟା ଦେଲେ । ଦତ୍ତେଶ୍ୱରଙ୍କୁ ନେଇ ଦିନ ତମାମ ବେଶ ଚର୍ଚ୍ଚା ହେଲା । ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଭକ୍ତ ଚରଣ ଦାସ ମଧ୍ୟ ଦତ୍ତେଶ୍ୱରଙ୍କୁ କଂଗ୍ରେସ ସମର୍ଥନ କରିବ ବୋଲି ଘୋଷଣା କଲେ । ମାର୍ଚ୍ଚ ୨ ତାରିଖରେ ଭକ୍ତ ଦଳର ବିଧାୟକମାନଙ୍କୁ ଭୁବନେଶ୍ୱରର ଏକ ତାରକା ହୋଟେଲକୁ ଡାକି ଆପ୍ୟାୟିତ କରିବା ସହ ଦତ୍ତେଶ୍ୱରଙ୍କୁ ସମର୍ଥନ କରିବାକୁ ପରାମର୍ଶ ଦେଲେ । ହେଲେ ସେହି ବୈଠକକୁ କଟକ-ବାରବାଟି ବିଧାୟିକା ସୋଫିଆ ଫିର୍ଦ୍ଦୋଷ ଏବଂ ସାନ ଖେମୁଣ୍ଡି ବିଧାୟକ ରମେଶ ଜେନା ଆସି ନ ଥିଲେ । ଏହାର ଦିନକ ପରେ ଅର୍ଥାତ ମାର୍ଚ୍ଚ ୩ ତାରିଖରେ ଭାଜପା ମନମୋହନ ସାମଲ ଏବଂ ସୁଜିତ କୁମାରଙ୍କ ନାମ ଘୋଷଣା କଲା । ଏହା ପରେ ଭାଜପା ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ଦିଲ୍ଲୀପ ରାୟ ସ୍ୱାଧୀନ ପ୍ରାର୍ଥୀ ଭାବେ ନାମାଙ୍କନ ଭରିବେ ବୋଲି ଘୋଷଣ କଲେ । ଦ୍ୱିଲ୍ଲୀପଙ୍କ ପ୍ରାର୍ଥୀତ୍ୱକୁ ଭାଜପା ସମର୍ଥନ କରିବ ବୋଲି ଭାଜପା ରାଜ୍ୟ ସଭାପତି ମନମୋହନ ସମାଲ ଗଣମାଧ୍ୟମକୁ କହିଲେ । ଦିଲ୍ଲୀପଙ୍କ ଏଣ୍ଟ୍ରି ରାଜ୍ୟ ସଭା ନିର୍ବାଚନକୁ ଆହୁରି ରୋଚକ କରି ଦେଇଛି । ଉଭୟ ବିଜେଡି ଓ କଂଗ୍ରେସ ପାଇଁ ଏହା ମୁଣ୍ଡ ବ୍ୟଥାର କାରଣ ହୋଇଛି । ରାଜନୀତିରେ ଧୁରନ୍ଧର ଦିଲ୍ଲୀପ ଗୋଟି ଚଳାଇବାରେ ମାହିର । ଯାହାକି ୨୦୦୨ ରାଜ୍ୟ ସଭା ନିର୍ବାଚନରେ ପ୍ରମାଣିତ ହୋଇ ସାରିଛି । ସେତେବେଳେ ନବୀନଙ୍କ ନିଷ୍ପତ୍ତି ବିରୋଧରେ ଯାଇ ଦିଲୀପ ସ୍ୱାଧୀନ ପ୍ରାର୍ଥୀ ଭାବେ ଛିଡା ହୋଇଥିଲେ । କଂଗ୍ରେସ ଓ ଅନ୍ୟ ବିଧାୟକମାନଙ୍କ ସମର୍ଥନରେ ସେ ବିଜୟୀ ହୋଇଥିଲେ । ଚଳିତ ନିର୍ବାଚନରେ ମଧ୍ୟ ଇତିହାସ ପୁଣି ଦୋହରାଇବ ବୋଲି କୁହାଯାଉଛି । କାରଣ ଦିଲ୍ଲୀପଙ୍କ ସହ ସବୁ ଦଳର ବିଧାୟକଙ୍କର ଅତି ଘନିଷ୍ଟ ସମ୍ପର୍କ ରହିଛି । ଭାଜପାର ପାଖରେ ୩ ଜଣ ସ୍ୱାଧୀନ ବିଧାୟକଙ୍କୁ ମିଶାଇ ମୋଟ ୮୨ ଜଣ ବିଧାୟକ ରହିଛନ୍ତି । ଦୁଇଟି ପ୍ରାର୍ଥୀ ବିଜୟୀ ହେବା ପାଇଁ ୬୦ ଜଣ ବିଧାୟକଙ୍କୁ ବାଦ ଦେଲେ ୨୨ ଜଣଙ୍କର ସମର୍ଥନ ଦିଲ୍ଲୀପଙ୍କ ସହ ରହିଛି । ବିଜୟୀ ହେବାକୁ ଆଉ ମାତ୍ର ୮ଟି ଭୋଟର ଆବଶ୍ୟକତା ରହିଛି । ଏମିତିକି ପିସିସି ସଭାପତି ଭକ୍ତ ଦାସଙ୍କର ଦିଲ୍ଲୀପଙ୍କ ସହ ଭଲ ସମ୍ପର୍କ ରହିଛି । ଦିଲ୍ଲୀପ ମଧ୍ୟ ଗତ ବୁଧବାର ଭକ୍ତଙ୍କ ସହ ଫୋନ ଯୋଗେ କଥା ବାର୍ତ୍ତା ହୋଇଛନ୍ତି । କଂଗ୍ରେସ ବିଧାୟକ ତାରା ବାହିନୀପତି, ରମେଶ ଜେନା, ଦାସରଥି ଗମାଙ୍ଗ ଏବଂ ସୋଫିଆ ଫିର୍ଦ୍ଦେଶସ ଯେ ଦଳର ନିଷ୍ପତିକୁ ମାନିବେ ତାହା ମଧ୍ୟ କହିବା ମୁସ୍କିଲ । ଏହାଛଡା ବିଧାୟକମାନଙ୍କୁ କିପରି ନିଜ ସପକ୍ଷରେ ନେବେ ସେ କଳା ଦିଲ୍ଲୀପଙ୍କ ଭଳ ଭାବେ ଜଣା । ପୂର୍ବତନ ବିଧାୟକ ପ୍ରଭାତ ବିଶ୍ୱାଳଙ୍କୁ ନବୀନ ବିଜେଡିରୁ ବହିସ୍କାର କରି ଦେଇଥିବାରୁ ତାଙ୍କ ପୁଅ ତଥା ଚୌଦାର ବିଧାୟକ ସୌଭିକ ବିଶ୍ୱାଳ ମଧ୍ୟ ଦିଲ୍ଲୀପଙ୍କ ଆଡକୁ ଢଳି ପାରନ୍ତି ବୋଲି ଚର୍ଚ୍ଚା ହେଉଛି । ନବୀନ ଓ ଭକ୍ତ ଭାଜପାକୁ ପାନେ ଦେବା ପାଇଁ ଯେଉଁ ମାଷ୍ଟର ଷ୍ଟ୍ରୋକ ଖେଳିଥିଲେ ଦିଲ୍ଲୀପଙ୍କ ଏଣ୍ଟ୍ରି ସବୁ ଚାଲକୁ ମାଟିରେ ମିଶାଇ ଦେଇଛି । ୪ର୍ଥ ଆସନ ପାଇଁ କଂଗ୍ରେସ ଓ ବିଜେଡି ପ୍ରାର୍ଥୀ ଦତ୍ତେଶ୍ୱର ନା ସ୍ୱାଧୀନ ପ୍ରାର୍ଥୀ ଦିଲ୍ଲୀପ ବାଜି ମାରୁଛନ୍ତି ତାହା ଉପରେ ଏବେ ସଭିଙ୍କ ନଜର ।